چۆنێتیی وەبەرهێنان لە ناوچە بەردەڵانییەكانی ناوچە شاخاوییەكاندا

رۆژی ١٢-١٢-٢٠١٧، لە دەستەی كوردستانی بۆ دراساتی ستراتیجی و توێژینەوەی زانستی، سیمینارێك بەناونیشانی (وەبەرهێنانی ناوچە بەردەڵانییەكانی ناوچە شاخاوییەكانی كوردستان) لەلایەن پڕۆفیسۆر د.جەمیل جەلال بەڕێوەچوو.

 

لە سیمینارەكەدا پڕۆفیسۆر د. پۆڵا ئازاد خانەقا سەرۆكی دەستەی كوردستانی، وتەی بەخێرهاتنی پێشكەشكرد و ئاماژەی بەوەشدا: دەستەی كوردستانی لە بەرنامەیدا بە چەند پڕۆژەیەك كاری زیاتر لەسەر ئەم بوارە بكات.

 

ناوەڕۆكی سیمینارەكە

لە سیمینارەكەدا تیشكخرایە سەر وەبەرهێنانی كشتوكاڵی لە هەرێمی كوردستان، بە تایبەت وەبەرهێنان لە ناوچە بەردەڵانییەكانی ناوچە شاخاوییەكانی كوردستاندا.

لەبارەی ناوەڕۆكی سیمینارەكەوە، پڕۆفیسۆر د.جەمیل جەلال بە سایتی دەستەی كوردستانی راگەیاند: ناوچە شاخاوییەكانی كوردستان لە كۆنەوە بە بەردەوامی تووشی راماڵین بووە و بەشێكی زۆر لە خاكەكەی نەماوە، تەنانەت لە هەندێك شوێندا هەموو خاكەكەی نەماوە و بەردەكان دەركەوتوون، ئەمەش كاریگەریی خراپی هەبووە لەسەر نەمانی رووپۆشی رووەكی لەو ناوچانەدا و بۆتە هۆی بەرزبوونەوەی زیاتری پلەی گەرما لە وەرزی هاوینداو دابەزینی زیاتری پلەی گەرما لە وەرزی زستاندا و تێكچوونی كەشوهەوای ناوچەكە. وتیشی: بۆ سەرلەنوێ گەڕانەوەی رووپۆشی رووەكی بۆ ئەم ناوچانە، پێویستە سوود لە چاندنی رووەكی چەقالە لەو ناوچانە وەربگرین، چونكە یەكێكە لەو رووەكانەی كە دەتوانێت لەم ژینگە سەخت و دژوارانەدا بژیت. ئەمەش كاریگەری دەبێت لەسەر سەوزبوونەوەی ئەو ناوچانە.

 

سوودەكانی چەقالە

 د.جەمیل جەلال باسی لەوەشكرد: چەقالە چەندین سوودی زۆر گرنگی هەیە لەوانە (ئاو و هەوا خۆش دەكات، بەربەستە بۆ پلەی گەرمای بەرز و نزم، سامانی هەنگ لە ناوچەكە پەرە پێدەدات كە ژمارەیەك لە دانیشتووانی ئەو ناوچانە سەرقاڵی پەروەردەكردنی هەنگن، بۆ باڵندە و ئاژەڵە كێوییەكان زۆر گرنگەو لە كاتی سەرما و گەرمادا سوودی لێدەبینن، هەروەها لەڕووی ئابوورییەوە بەرهەمەكەی بۆ گوندنیشینان گرنگە).

وتیشی: هەر لە سیمینارەكەدا تیشكمان خستەسەر شێوازی چاندنی رووەكی چەقالە و هەندێك رووەكی دیكە لە ناوچە بەردەڵانییەكانی ناوچە شاخاوییەكانی كوردستان، بۆ ئەوەی ئەو ناوچانە بكرێن بە رووبەرێكی سەوزایی. نرخی خۆراكی گرنگیی ئەم رووەكەشمان خستەڕوو كە رێژەیەكی زۆر رۆنی تێدایە و یەكێكە لە رووەكە باشەكان، پێكهاتەی گرنگیی دیكەشی تێدایە و دوای خۆشكردنی سوودی هەیە بۆ ئەو كەسانەی كە تووشی نەخۆشی شەكرە بوون. هەروەها ئەم رووەكە دەتوانێت تەنها بە باران لە ژینگەیەكی سەختدا بژی.

 

تیبَینی و سەرنجی ئامادەبووان و وەڵامدانەوەی پرسیار و سەرنجەكان، ناوەڕۆكی سیمینارەكەی دەوڵەمەند تر كرد.

 

 

شایانی باسە، پڕۆفیسۆر د.جەمیل جەلال تائێستا لەمبوارەدا نزیكەی 40 توێژینەوەی زانستی بڵاوكردۆتەوە. پێشتریش لە رۆژی 26-4-2017، لە دەستەی كوردستانی سیمینارێكی بەناونیشانی (وەبەرهێنانی ئاو لە ناوچەی قەرەداغ، وەبەرهێنانی زەوی لەناوچەی سیروان، وەبەرهێنانی ژینگەی دژواری سەختی ناوچە شاخاوییەكان و بەردەڵانییەكان بۆ بەرهەمهێنانی میوە)، پێشكەشكرد.


KISSR - Newsroom:  Dec 13 2017 12:48 AM / halkawt