لە شەوی درێژترین دیاردەی مانگ گیراندا وەزارەتی خوێندنی باڵا و دەستەی كوردستانی چەند چالاكییەكی زانستییان به‌ڕێوه‌برد

له‌به‌ر ڕۆشنایی پلانی ستراتیجیی وه‌زاره‌ت بۆ نزیكردنه‌وه‌ی زانست له‌ كۆمه‌ڵگه‌ و ئاشناكردنی تاكه‌كانی كۆمه‌ڵگه‌ به‌و گۆڕانكارییه‌ سروشتیانه‌ی له‌گه‌ردون ڕووده‌ده‌ن، شەوی (27 لەسەر 28-7-2018)، هاوشێوەی چەند وڵاتێكی دیكەی جیهان، لە عێراق و هەرێمی كوردستانیش درێژترین دیاردەی مانگگیران ڕوویدا. لەو شەوەدا لە پاركی هەواری شار لە سلێمانی، وەزارەتی خوێندنی باڵا و توێژینەوەی زانستی به‌هاوكاری دەستەی كوردستانی بۆ دراساتی ستراتیجی و توێژینەوەی زانستی، چەند چالاكییەكی زانستی ڕێكخست.

 

 

ژمارەیەكی زۆر لە هاووڵاتیان لە سەرجەم چین و توێژەكان بەشدارییان تێدا كرد

 

لەبارەی چالاكییەكانەوە، پڕۆفیسۆر د.پۆڵا خانەقا سەرۆكی دەستەی كوردستانی بۆ دراساتی ستراتیجی و توێژینەوەی زانستی ڕایگەیاند: چالاكییە زانستیەكان بە سەرپەرشتی وەزارەتی خوێندنی باڵا و توێژینەوەی زانستیی هەرێم و لەسەر ڕاسپارده‌ی د.یوسف گۆران وەزیری خوێندنی باڵا و توێژینەوەی زانستی، لەلایەن دەستەی كوردستانی بۆ دراساتی ستراتیجی و توێژینەوەی زانستییەوە رێكخرا، وتیشی: لەم چالاكییە زانستییەدا كە ژمارەیەكی زۆر لە هاووڵاتیان لە سەرجەم چین و توێژەكان بەشدارییان تێدا كرد، شێواز و هۆكارەكان و  چەندین زانیاری زانستی دەربارەی دیاردەی مانگ گیران ڕوونكرانەوە، راشیگەیاند: هەر لەم چالاكییە زانستییەدا لە ڕێگەی حەوت تیلسكۆپ و كامێرایەكی تایبەت و ئامێری داتاشۆوە، هاووڵاتیان لە نزیكەوە تەماشای دیاردەكەیان دەكرد.

 

ئامانجی چالاكییەكە

 

هه‌ر له‌ لێدوانه‌كه‌یدا، سەرۆكی دەستەی كوردستانی بۆ دراساتی ستراتیجی و توێژینەوەی زانستی ئامانجی چالاكییەكەشی ڕوونكردەوە و ئاماژەی بەوەدا "ئامانج لە چالاكییەكە ئاشناكردنی هەموو چین و توێژەكانە، بە تایبەت لاوان و گەنجان بە دیارە سروشتییەكان و مامەڵەكردنی زانستییانەیە لەگەڵ هەموو ئەو دیاردە سروشتیانەی كە ڕودەدەن".

 

چالاكییە زانستییەكە لە سەعات (7:30) دەقیقەی سەر لەئێوارەوە تا سەعات (2:30) دەقیقەی شەوی خایاند و هاووڵاتیان ڕاستەوخۆ هەم لە ڕێگەی تیلسكۆپ و كامێرایەكی تایبەتەوە، هەم لە ڕێگەی ئامێری داتاشۆوە كە ڕاستەوخۆ دیاردەی مانگ گیرانی دەگواستەوە، بینەری تەواوی شێواز و كاتەكانی دیاردەی مانگ گیران بوون، لەلایەن چەندین توێژەر و پسپۆڕی تایبەتیشەوە، ڕێنمایی پێویست دەكران و تەواوی زانیارییەكان لەسەر دیاردەی مانگ گیران ڕووندەكرانەوە.

 

 

هاووڵاتیان: ئەم چالاكییە زانستییە بە هەنگاوێكی گرنگە

 

هاووڵاتیانی بەشداربووش لە چالاكییە زانستییەكەدا ئەم هەنگاوەیان بەكارێكی گرنگ و پێویست ناوبرد و، دەستخۆشییان لە ڕێكخەران و سەرپەرشتیارانی ئەم چالاكییە كرد. لەوبارەیەوە خاتوو ئاسكە حەسەن تەمەن (52) ساڵ ڕایگەیاند: ئەم چالاكییە زانستییە بە هەنگاوێكی گرنگ دەزانم و مایەی دەستخۆشییە، خۆشبەختانە ژمارەیەكی زۆر لە هاووڵاتیان لە نزیكەوە و لە ڕێگەی ئەو ئامێرانەی كە دانرابوون تەماشای بینینی دیاردەی مانگ گیرانیان دەكرد. خۆشبەختانەش ئەم چالاكییە سوودی زۆری هەبوو بۆ ئامادەبووان.

 

بڕوا عەلی گەنجێكی تەمەن (23) ساڵ و یەكێك لە ئامادەبووانی چالاكییەكە، باسی لەوەكرد "لەم چالاكییە زانستییەدا چەندین زانیاریی گرنگ و پێویست لە بارەی دیاردەی مانگ گیرانەوە ڕوونكراوه‌ته‌وه‌ کە دەتوانم بڵێم بەشێكی زۆری ئامادەبووان یەكەمجارمان بوو ئەو زانیارییە زانستییانە ببیستین. هیواداریشم چالاكی لەمجۆرە بەردەوام بێت، چونكە ئەم چالاكییانە گرنگ و پێویستن بۆ ئەوەی هاووڵاتیان بە شێوەیەكی گشتی سوودی زیاتر لە ناوەند و دەزگا زانستییەكان وەربگرن".


KISSR - Newsroom:  Jul 28 2018 05:49 PM / Hallkawt Zangana