لەم مانگەدا کۆرسەکانى زمانى ئينگلیزى لە زانکۆکانى كوردستان دەستپێدەکات

دواى دەرچوونى ئەنجامى تاقیكردنه‌وه‌ی دیاریکردنى ئاستەکانى زمانى ئینگلیزى لە زانکۆکانى هەرێمى کوردستان بۆ کاندیدانى ماستەر و دکتۆرا و خوازیارانى بەدەستهێنانى نازناوى زانستى، بڕیارە لەم مانگەدا کۆرسەکانى زمان لە زانکۆکان دەستپێبکەن.

عەباس ئەکرەم وتەبێژى وەزارەتى خوێندنى باڵا و توێژینەوەى زانستى لە لێدوانێکدا ڕایگەیاند: دوابەدواى دەرچوونى ئەنجامى تاقیکردنەوەى دیاریکردنى ئاستەکانى زمانى ئینگلیزى لە زانکۆکانى هەرێمى کوردستان، کە بەهاوبەشى نێوان سەنتەرەکانى زمان و ڕێکخراوى ئیمیدیست به‌ڕێوه‌چوو، لەئەنجامدا سەرجەم کاندید و خوازیاران ئاستەکانیان لەلایەن سەنتەرەکانەوە دیاریکرا، لە ئێستادا سەرجەم ئامادەکارییەکان بۆ دەستپێکردنى کۆرسەکانى زمانی ئینگلیزی تەواوبووە و، وابڕیارە لەم مانگەدا کۆرسەکانیان لە سەنته‌ره‌كانی زمان له‌ زانکۆکانى (سەڵاحەددین/هه‌ولێر، سلێمانى، دهۆک، گەرمیان، سۆران و ڕاپەڕین) دەستپێبکات.

بۆ وەرگرتنى زانیارى لەبارەى دیاریکردنى ئاستەکان و ماوەى کۆرسەکان، وتەبێژى وەزارەتى خوێندنى باڵا و توێژینەوەى زانستى ڕایگەیاند: کاندیدانى ماستەر و دکتۆرا و خوازیارانى بەدەستهێنانى نازناوى زانستى، دەتوانن سەردانى سەنتەرەکانى زمان لە زانکۆکانى (سەڵاحەددین/ هه‌ولێر، سلێمانى، دهۆک، گەرمیان، سۆران و ڕاپەڕین) بکەن و زانیارى زیاتر بەدەستبهێنن.


KISSR - Newsroom:  Dec 02 2018 07:53 AM / Hallkawt Zangana