رەوانەکردنى خوێندکار و مامۆستا بۆ خوێندنى باڵا لە فەرەنسا دەستپێدەکات

بەمەبەستى ئەنجامدانى پڕۆژەى ئەکادیمى هاوبەشى بەرنامەکانى (ماستەر  دکتۆرا  پۆست دکتۆرا  ڕاهێنانى ستافى ئەکادیمى و کارگێڕى و ئەندازیارى)، لەمانگى ئەیلولى ئەمساڵ وەزارەتى خوێندنى باڵا و توێژینەوەى زانستى ڕێککەوتنامەیەکى هاوبەش لەگەڵ باڵیۆزخانەى وڵاتى فەرەنسا – بەغدا بە نوێنەرایەتى حکومەتى ئەو وڵاتە ئیمزادەکات.

د.جوان جەلال شەریف بەڕێوەبەرى گشتى فەرمانگەى نێردراوان و پەیوەندییە ڕۆشنبیرییەکان لە وەزارەتى خوێندنى باڵا و توێژینەوەى زانستى ڕایگەیاند: بڕیارە لە مانگى ئەیلولى ئەمساڵ وەزارەتەکەمان بە هاوبەشى لەگەڵ باڵیۆزخانەى وڵاتى فەرەنسا بە نوێنەرایەتى حکومەتى ئەو وڵاتە پڕۆژەى ئەکادیمى (ماستەر  دکتۆرا  پۆست دکتۆرا  ڕاهێنانى ستافى ئەکادیمى و کارگێڕى و ئەندازیارى)، ڕێککەوتنامەیەکى هاوبەش ئیمزا بکات، وتیشى: بەشێوەیەکى گشتى مەرجەکان بریتین لەمانەى خوارەوە:

 بۆ خوێندنى دکتۆرا پێویستە پێشکەشکار تەمەنى لە (٤٠) ساڵ زیاتر نەبێت، بۆ ماستەر پێویستە تەمەنى پێشکەشکار لە (٣٠) ساڵ زیاتر نەبێت، هەروەها خوێندن بە هەردوو زمانى فەرەنسى و ئینگلیزى دەبێت و ئاستى زمانەکەش بەپێى سروشتى زانکۆ و پرۆگرامى خوێندنەکە دیاریدەکرێت، بۆ خولەکانى ڕاهێنانیش تەمەن وەک مەرج هەژمار ناکرێت.

لەبارەى کاتى ئیمزاکردنى ڕێککەوتننامەکەى نێوان وەزارەتى خوێندنى باڵا و توێژینەوەى زانستى لەگەڵ وڵاتى فەرەنسا، د.جوان جەلال شەریف وتى: ئەم ڕێککەوتنە بۆ ماوەى ٣ ساڵ بەردەوام دەبێت، بڕیارە لەمانگى ئەیلولى ئەمساڵ ئیمزابکرێت کە لە قۆناغى یەکەمدا بە مەبەستى ڕاهێنان توێژەرەکان ڕەوانەی ئەو وڵاتە دەکرێن، لە قۆناغى دووەمیشدا یەکەم گروپى خوازیارانى دکتۆرا ڕەوانە دەکرێن و دواتریش قۆناغەکانى دیکەى ماستەر و پۆست دکتۆرا ڕەوانە دەکرێن.

سەبارەت بەخەرجى ئەم بەرنامانە، بەڕێوەبەرى گشتیى فەرمانگەى نێردراوان و پەیوەندییە ڕۆشنبیرییەکان ئەوەى ڕونکردەوە، کە تەواوى خەرجیەکانى ئەم بەرنامانە لە ئەستۆى حکومەتى  فەرەنسا دەبێت، جگە لە بژێوى ژیان کە وەزارەتى خوێندنى باڵا و توێژینەوەى زانستى حکومەتى هەرێمى کوردستان لەئەستۆى دەگرێت، هەروەها چاوپێکەوتنى خوازیاران لەڕێگەى لیژنەیەکى تایبەت ئەنجامدەدرێت، کە پێکهاتوون لە وەزارەتى خوێندنى باڵا و توێژینەوەى زانستى و  نوێنەرى باڵیۆزخانەى فەرەنسا.

 


KISSR - Newsroom:  Jul 04 2019 08:17 AM / Hallkawt Zangana






نوێترين هەواڵ