وەزیرى خوێندنى باڵا: پێویستە هەموو جێگایەکی وڵاتەکەمان بکەینە ژینگەیەک بۆ خوێندن و فێربوون و داهێنان

 

وەزیرى خوێندنى باڵا و توێژینەوەى زانستى رایگەیاند: پێویستە هەموو جێگایەکی وڵاتەکەمان بکەینە ژینگەیەک بۆ خوێندن و فێربوون و داهێنان، بۆ بەدیهێنانی ئەم ئامانجانەش پێویستمان بە هاوکاری و هەماهەنگی زیاتری نێوان وەزارەتی پەروەردەو خوێندنی باڵای حکومەتی عیراق و هەرێمی کوردستانە.

ئەم وتانەى د.ئارام محەمەد قادر وەک نوێنەرى بەڕێز مەسرور بارزانى سەرۆکى حکومەتى هەرێمى کوردستان رۆژی ٥-٩-٢٠١٩، لەمیانى کردنەوەى کۆنگرەو پێشانگای رۆژهەڵاتی ناوەڕاست بۆ خوێندن و تەکنۆلۆجیاو خوێندکاران و قوتابیان هات، کە ژمارەیەک لەوەزیرانى حکومەتى عیراق و هەرێمى کوردستان و کونسوڵ و نوێنەرى وڵاتان ئامادەیبوون.

لەمیانەى پێشکەشکردنى وتەیەکیشدا د.ئارام محەمەد قادر بەناوی سەرۆکی حکومەتی هەرێمی کوردستانەوە رایگەیاند: هیوادارین ئەم بۆنەیە دەرفەتێکی گونجاو بێت بۆ دروستکردنی دیبەیتێکی نیشتمانی دەربارەی گرفتەکانی سیستمی پەروەردە و خوێندنی باڵا لەسەر ئاستی عیراق و هەرێمی کوردستان، روونیشىکردەوە: پەروەردە و خوێندنی باڵا بنەمای سەرەکی گەشەپێدانی هەمەلایەنەی هەر وڵاتێکە، بۆ ئەوەش وتى: هەموومان دەبێت پێکەوە کاربکەین بۆ داڕشتنەوەی نەخشەڕێگای ڕیفۆرم و چاکسازی ئەم کەرتە گرنگە، و سیستمی خوێندمان، فەلسەفە و ناوەرۆکی پرۆگرام و سیستمی پێداگۆجیمان پێویستی بە دووبارە هەڵسەنگاندن و پێداچوونەوە و ریفۆرم هەیە. وتیشى: پرۆسەی خوێندن لەژێر کاریگەری گەشەکردنی تەکنۆلۆجیا و گۆڕانکارییە ئابوورییەکانی سەدەی بیست و یەک و دەرفەت و پێداویستییەکانی بازاڕی کار هەمیشە لە گۆڕانکاریدایە، لەم ڕوانگەیەوە وەزیرى خوێندنى باڵا رایگەیاند: ئێمەش پێویستمانە بە دیدو دنیابینییەکی کراوە، خۆمان بۆ گۆڕانکاریی چاکسازی ئامادە بکەین.

لەبارەى داڕشتنەوەى سیستمى پەروەردەو خوێندن لە زانکۆکان، وتى: گرنگە سیستمی پەروەردەیی و خوێندنی زانکۆکانمان بە جۆرێک دابڕێژینەوە کە قوتابی و خوێندکار بکەینە سێنتەری پرۆسەی فێربوون و بواری بیرکردنەوە و داهێنان و کارسازی و بنیادنانی کارامەیی تێڕوانینی ڕەخنەیی زیاتر بۆ ڕۆڵەکانمان برەخسێنین، وتیشى: پێویستە گرنگی زیاتر بە خوێندنی تەکنیکی و ڤۆکەیشناڵ بدەین و ناوەرۆکی پرۆگرامەکانی خوێندنمان زیاتر ببەستینەوە بە پێداویستییەکانی بازاڕی کار و سێکتەرەکانی کۆمەڵگا و بزنس و پیشەسازیی.

لەو چوارچێوەیەشدا وەزیرى خوێندنى باڵا وتى: ئێمە وەک حکومەتی هەرێمی کوردستان هەموو زەمینەسازییەک بۆ هاوکاری و هەماهەنگی و کاری پێکەوەیی دەڕەخسێنین، هیوادارم خوشک و برایانمان لە حکومەتی عیراقی فیدراڵ لەم پرۆسەیەدا هاوکار و پشتیوان بن، وتیشى: زۆر گرنگە هەمیشە ئەو ڕاستییەمان لەپێش چاوبێت کە دوای ئەو نەهامەتیانەی لەمێژوودا بەسەر گەلانی عیراقدا هاتووە، بزانین کە شاڕێی بنیادنانی خۆشگوزەرانی و ئارامی و سەقامگیری سیاسی و کۆمەڵایەتی بریتییە لە داڕشتنەوەی سیستمێکی پەروەردەیی مۆدێرن و پێشکەوتوو.

جێگەى ئاماژەیە کۆنگرەو پێشانگەی ڕۆژهەڵاتی ناوەڕاست بۆ خوێندن و تەکنۆلۆجیا و خوێندکاران و قوتابیان بۆ ماوەى چوار ڕۆژ لە هۆڵى پێشانگه‌ى نێودەوڵەتیى هەولێر بەردەوام دەبێت و تیایدا چەندین پانێڵ و دیبەیت و گفتوگۆى کراوەى زانستى لەلایەن پسپۆڕان و ئەکادیمیستان پێشکەشدەکرێت.

بۆ خوێندنه‌وه‌ی ده‌قی وتارى د.ئارام محەمەد قادر نوێنەرى سەرۆکى حکومەتى هەرێمى کوردستان لە کۆنگرە و پێشانگەى ڕۆژهەڵاتى ناوەڕاست بۆ خوێندن و تەکنەلۆجیا و خوێندکاران-قوتابیان کلیک لێـــــــــــــــــــــــــره  بکه‌.

 


KISSR - Newsroom:  Sep 08 2019 07:42 AM / Hallkawt Zangana






نوێترين هەواڵ